For dei fleste av oss er det viktig å få bu der vi kjem ifrå. Derfor treng vi fleire fosterheimar i eigen kommune, for dei barna som ikkje kan bu hos nokon frå familien sin. «It takes a village to raise a child», er grunnforståelsen i arbeidet med å ta vare på barn og unge som treng fosterheim. Vi står saman for å sikre at barn som bor i fosterheim skal oppleve ein trygg og kjærleg omsorgssituasjon.
På denne sida kan du lese om å være fosterheim og kva støtte, oppfølging og godtgjersle du får som fosterheim for Øygarden barnevernteneste.
Kva oppfølging får eg som fosterforelder i Øygarden kommune?
Som fosterheim for Øygarden, vil du få ein kontaktperson og ein rettleiar som du har regelmessig kontakt med, og som du kan kontakte ved behov. Med dei kan du drøfte praktiske spørsmål eller ulike dilemma og problemstillingar. Teamet som blir etablert følger opp både barnet, foreldre, fosterheim, skulen/barnehagen og andre involverte personar.
I starten av oppdraget går de gjennom ein rettleiingsprosess der vi vil bidra til at dykk får ein god start saman med barnet som flytter inn. Vi pratar om relasjonen dykkar til barnet og knyt den opp mot kunnskap på aktuelle tema. Det kan til dømes være å auke forståinga om kva konsekvensar barnet bær etter å måtte flytte i fosterheim og korleis det kan påverke relasjonen mellom dykk.
De kan få rettleiing både individuelt og i grupper saman med andre fosterheimar. Eventuelle eigne barns omsorgsbehov vil også være eit naturlig tema i rettleiinga.
Som fosterheim er de aktive utøvarar i landsbyen til barnet. Barneverntenesta vil leggja til rette for at alle dei vaksne skal samhandla med utgangspunkt i omsorgsbehovet til barnet. Barneverntenesta vil sikra nødvendige forsterkningstiltak for å sikra omsorgsrammene.
Kva godtgjersle får vi?
Alle fosterheimar får ei grunnstønad og dekking av utgifter ut frå KS sine satsar. Du vil i tillegg få barnetrygd slik du får for eigne barn. På KS sine heimesider finn du gjeldande satsar: KS rettleiande satsar for fosterheim.
De vil få støtte til andre ekstrautgifter som f.eks. briller, helsetenester, tannhelse, dåp/konfirmasjon, sertifikat med meir.
Fosterforeldre får ei grunnstønad. Det er ei pensjonsgivande inntekt som gir opptening av alderspensjon i folketrygda. Per nå blir ikkje fosterforeldre rekna som arbeidstakarar, men som oppdragstakarar/frilansarar og blir likestilt med sjølvstendig næringsdrivande. Difor får ikkje fosterforeldre opptening i tenestepensjon, men kan spare til pensjon i private pensjonsordningar.
Nokre gonger blir fosterforeldre frikjøpt frå sitt daglege arbeid for å kunne være fosterheim på heiltid. Ein kan bli frikjøpt frå heile eller deler av stillinga, ut ifrå kva behov barnet og familien har. Det betyr at barneverntenesta betalar for tapt inntekt, opptil eit rettleiande tak på 6G i året. Som fosterheim har ein rett på permisjon inntil 3 år utan løn frå sitt arbeid, når fosterbarnet er under 15 år.
Dersom du er uføretrygda og fosterforelder, vil NAV gjere ei avkorting av yting, fordi grunnstøtta er høgare enn kva ein har anledning til å tene som ufør. Dette tapet vil sjølvsagt barneverntenesta kompensere for.
I fosterheimsavtala kan du lese meir detaljert kva du får og kva du forpliktar deg til dersom du takkar ja til å bli fosterheim for eit barn.
Vil du vite meir?
Dersom du er litt nysgjerrig, kan du lesa meir om det å bli fosterheim for eit barn i eige nærmiljø, på fosterhjem.no. Du kan også ta uforpliktande kontakt med fosterheimstenesta her.
Nyttige lenkjer
Fleire videoar