I sør er du velkomen til å gå frå Stranda skule, der det er god parkeringsplass. For å henta bilane etter gudstenesta, kan sjåførane ta rutebuss kl 13.25 frå Klokkarvik tilbake til skulen.

Frå Stranda startar stien ved den gigantiske gitaren som Øyvind Heggstad har designa og bygd med god hjelp av Reidar Vorland frå turlaget. Turløypa som tar ein sving opp til Storavarden, er på mange måtar tileigna trubaduren Johannes Kleppevik. Det kan du lett sjå på ein del installasjonar langs løypa. Strekket mot Storavarden var ein del av eit nasjonalt folkehelseprosjekt, lokalt leia av  biblioteksjef Bente Fosse. Dette har blitt eit attraktivt friluftslivsområde, særleg for skulane, barnehagen og alle som bur i Strandakrinsen. Her finn du ein lavvo, benkar og sildekassar med skiftande aktivitetsopplegg. Du blir invitert til artige kultur-, natur- og litteraturopplevingar i løypa.

Tidlegare Sund turlag har lagt ned mykje arbeid med stiane sør i kommunen, inkludert dei som går frå Stranda og Vorland. Frå Hamrevatnet og opp til Fadrabore er det Strandatunet bygdalag og Palestimen MC som har rehabilitert stien.

Fadrabore

Fadrabore er ei stor steinhelle der det høver godt å ta ein rast. Her er det festa ei plate på bergveggen med eit dikt av Reidar Steinsland. Diktet  skildrar historia om vegen til kyrkja.

Frå Fadraborde går kyrkjestien ned Åsendalen, forbi Grindavatnet og vidare gjennom den tronge passasjen Hestaklypa. Når vi kjem ned til Førde følgjer vi Nordsjøløypemerkinga fram til Sund kyrkje. Før vi kjem heilt fram, er det ein plass som har fått namnet Skautakleiva. Der tok kvinnene skautet på seg, og alle gjorde seg presentable for kyrkjegang.

Sund kyrkje

Sund kyrkje er frå 1997. Den vakre langkyrkja frå 1877 brann ned i 1994. På kyrkjestaden har det vore fire kyrkjer, den eldste frå 1100-1200-talet og den neste frå 1674.

Kyrkjerommet i den nyaste kyrkja har halvvifteform med om lag 300 sitjeplassar. Med tilstøytande rom kan ein få plass til dobbelt så mange. Sund kyrkje er i tillegg til kyrkjeleg bruk, eit svært godt konsertlokale.

Sund kyrkje

Pilegrimsvandringa mot Fjell kyrkje vil starta på kyrkjevegen frå Morland.  Den følgjer Nordsjøløypa gjennom utmarka langs austsida av Kyrkjevatnet, vidare mellom Midtvatnet, Eidesvatnet og Liavatnet. Nordsjøløypa ender her ved asfaltert veg til stor parkeringsplass og opp til kyrkja.

Pilegrimsturen vil framheva kunnskap om farne tiders bruk av kyrkjevegane og små historier knytt til desse. Undervegs gjer vi små stopp og knyter sentrale delar av ei gudsteneste til elementa i naturen. Pilegrimsturane vil understreka begge retningane vi ser i krossen: Oppover til Gud, hans skaparkraft og miskunn, og utover til natur og medmenneske, og vår plass og vårt ansvar for skaparverket.

Turlaget og Fjell kommune har lagt ned mykje arbeid med å merka og halda stien ved like. I dag er det Sotra Øygarden turlag som har tatt på seg vedlikehaldsansvaret.

Fjell kyrkje

Fjell kyrkje er allereie nemnd i skrifter frå 1338. Seinare vart det bygd kyrkje på slutten av 1700-talet. Kanskje kan det ha vore bygd ei kyrkje i mellomtida. Det er lite att av den første kyrkja, men eit alterskåp frå 1400-talet heng i kyrkja i dag. Denne kyrkja vart vigsla i 1874 og er ei vakker langkyrkje. Ho har 700 sitjeplassar.

Fjell kyrkje 

Kystpilegrimsleia i nord går gen frå Hellesundet til Hjelme gamle kyrkje.  Historisk sett er det sjøen som har vore kyrkjevegen for folk i Hjelme sokn. Men utan båt kunne folk koma seg til kyrkja gjennom utmarka både frå Nautnes, Sæle, Bakken Hellesund og Hellesøy. Det fanst ikkje veg, men stiar kom til med tida. Desse stiane var likevel ikkje særleg godt opparbeidde, og det var alltid fare for å få kyrkjekleda tilsølte i myrlendt terreng. Det blir òg fortald at eit uthus i Hjelme vart brukt som omkledingsrom for kvinner som ikkje tok sjansen på å vandra gjennom utmarka i finstasen. Lakkskorne kom på her, sidan mange gjekk i treskor gjennom marka. Det var òg eit naust som var brukt til dette formålet for dei som kom sjøvegen og ikkje ville koma søkkvåte av sjøsprøyt til kyrkja.

Kyrkjestiane frå Nautnes og Sæle er borte etter at bilvegen vart bygd ferdig i 1955, men den gamle kyrkjevegen frå Hellesund til Hjelme finst framleis og er flittig brukt som turveg. Ei sidearm av denne stien kjem opp frå Bakken.

Stiane på heile Hellesøy blir godt vedlikehaldne og merka av dugnadsfolk i Bakken krins. Nærmiljøutvalet er svært aktivt med å leggja til rette for gode kultur-og naturopplevingar. På Hengjo er det stor aktivitet, og om sommaren er det mogleg å få seg eit godt måltid mat her.

Hjelme gamle kyrkje

Hjelme gamle kyrkje vart bygd i 1875.  Kyrkja er restaurert og fungerer som eit verdifullt kulturminne. Ho er av til i bruk som bryllupskyrkje. Elles har det vore arrangert konsertar med religiøse folketonar i kyrkja som har 180 sitjeplassar.

Det er ein liten, men interessant gravplass ved kyrkja. Det var lite jord i nærleiken, så bøndene fekk pålegg om å føra jord til kyrkjegarden. Denne kyrkjegarden var i bruk fram til det vart opparbeidd ny kyrkjegard på Bakken. Her vart Hjelme nye kyrkje innvigd i 1971.

Hjelme gamle kyrkje