Dette skal skje
Arbeidet med arealdelen til kommuneplanen har fleire fasar og milepælar. I første omgang vert det utarbeidd eit strategisk planprogram, der vi skal vedta politiske strategiar og prinsipp som gir ei tydeleg retning for korleis vi i framtida skal bruka og verna om areala våre. Sjølve arealdelen vert utarbeidd i 2026-2027.
I 2024 og 2025 vert det utarbeidd fleire rapportar og utgreiingar som er viktige kunnskapsgrunnlag når vi seinare skal fastsetta arealbruken. Les meir om kva kunnskap vi arbeidar med her: Kunnskapsgrunnlag.
Vi treng også innspel frå deg som innbyggar, frivillig eller næringsdrivande om korleis vi skal utvikla dei ulike delane av kommunen vår, gjennom heile arbeidet. Til kva tid og om kva tema du kan engasjera deg i, vert kunngjort på nettsida til kommunen, nettavisa til Vestnytt og i sosiale media. Nettsida til kommunen vil alltid vera oppdatert med siste nytt.
Kva skjer no?
Våren 2024 har vi hatt sju medverknadsmøter i lokalsentera. Det har også vore høve til å koma med innspel om lokalsentera gjennom digital kartløysing, e-post eller brevpost. No arbeider vi med å samla alle innspela i ein rapport, som saman med anna kunnskap vil danna grunnlag for å utarbeida eigne strategiar for lokalsentera.
Kva skjer seinare?
Vi opnar for innspel om bygdene. Meir informasjon om korleis dette skal skje vil koma på nettsidene til kommunen.
Vi skal også arbeida fram kunnskapsgrunnlag om fleire tema, der hovudfokuset er kva som er viktige verdiar i Øygarden, som natur, matjord, kultur og strandsone vi bør ta vare for framtida. Det vil verta mogleg å komma med innspel om kva som er viktig for deg. Meir informasjon om korleis dette skal skje vil koma på nettsidene til kommunen til hausten.
I desember 2024 skal kommuneplanutvalet drøfta strategiar og prinsipp for kva verdiar vi skal ta vare på når vi planlegg framtidas arealbruk.
I denne tida skal vi arbeida fram kunnskapsgrunnlag om tema som klima og klimaomstilling og næring på land og i sjø. Også for desse temaa vil det vera mogleg å komma med innspel om kva som er viktig for deg. Det vil blant anna verta lagt opp til medverknadsaktivitetar retta mot næringsaktørar våren 2025.
I august/september 2025 prøver vi å ha klart eit forslag til strategisk planprogram med strategiar og prinsipp for arealbruken i Øygarden. Det er kommunestyret som skal legga dette ut på høyring, slik at innbyggjarar, lag- og organisasjonar, næringslivet, hytteeigarar, barn og unge og alle andre som bryr seg om Øygarden kan komma med sine meininga om forslaget.
Etter høyringsperioden vil administrasjonen og kommuneplanutvalet vurdera alle merknadane som er komen inn, og vurdera behovet for endringar av strategiar og prinsipp i endeleg forslag til strategisk planprogram.
I Januar/februar 2026 skal kommunestyret ta stilling til og vedta endeleg strategisk planprogram. Ved kunngjering av dette vert det opna opp for arealinnspel om til dømes endra arealbruk til bustadtomter, naust, næringsbygg og liknande.
Strategiane og prinsippa for korleis vi skal bruka areala i kommunen vår skal leggast til grunn for vurdering av arealinnspel.
Innan desember 2026 skal alle arealinnspela vera ferdig vurderte, og administrasjonen legg fram eit forslag til ny arealdel til kommuneplanen. Forslaget skal drøftast av kommuneplanutvalet og vert lagt ut på høyring av kommunestyret. I høyringsperioden vil alle som ønsker kunna seia si meining om forslaget som er på høyring. Det vil også verta arrangert fleire medverknadsaktivitetar i denne tida.
Denne våren skal administrasjonen og kommuneplanutvalet vurdera alle merknadane som er komen inn, og vurdera om det er behov for å gjera endringar av høyringsforslaget til ny arealdel. Innan mai skal administrasjonen legga fram endeleg arealdel til kommuneplanen 2027-2039, som skal drøftast i kommuneplanutvalet. Kommunestyret skal vedta endeleg areal del til kommuneplanen innan juni 2027.
Kva har vi gjort til no?
Fram til no har arbeidet først og fremst handla om å skaffa oss nødvendig kunnskap, for å kunna ta gode avgjersler for framtidas arealbruk. På nettsida til kommunen legg vi ut informasjon om kva kunnskap vi skaffar oss, og når ulike rapportar vil vera klare. Våren 2024 har vi gjennomført opne innspelsmøte i dei sju lokalsentera i kommunen. Samstundes har det vore mogleg å senda inn innspel om lokalsentera i perioden 22. mai til 23. juni.