Kunnskapsgrunnlag for Straume
I 2024 og våren 2025 vil kommunen arbeida for å skaffa oss nødvendig kunnskap for å ta gode avgjersler for framtidig arealbruk på Straume. I sluttrapporten for parallelloppdraget som kommunestyret slutta seg til i juni 2023, er det utforma 10 råd for den vidare utviklinga av Straume.
Utifrå desse 10 råda har kommunedirektøren identifisert nokre tema og delprosjekt som kommunen skal arbeida vidare med. Lista nedanfor viser kva tema administrasjonen arbeider med og kva delprosjekt som er starta opp. Undervegs i arbeidet vil både politikarane og administrasjonen måtta vurdera ulike scenario for utvikling innanfor dei ulike temaa, for å til slutt komma fram til gode, framtidsretta og heilskaplege løysingar. Rapportar og liknande vert publisert her så snart dei er klare.
I tida framover skal vi arbeida fram desse kunnskapsgrunnlaga
Strategisk planprogram skal definera ein indre sentrumskjerne, nærområdet til sentrumskjernen og ytterkanten av regionsenteret, og ta stilling til kva innhald og funksjonar som skal plasserast i dei respektive områda. Rett lokalisering av bustad, handel, servicetilbod og kommunale tenester vil vera ein del av drøftinga. Analysearbeidet som legg grunnlaget for val av sentrumsutstrekning pågår.
Kommunen har fleire sentrale eigedomar på Stovevatnet, ved rådhuset og helselandsbyen og på Bildøyna. Kommunen må ta stilling til korleis vi best kan utnytte desse eigedomane. Vil det vera best å nytta dei til offentlege formål og tenesteutvikling, eller for å sikra kommunal kapital til gjennomføringa av sentrumsutviklinga og finansiering av offentlege behov? For å få heile i kostnadsbiletet vil kommunen måtta vurdera alternative løysningar opp i mot driftskostnader og verdibevaring av området, både når det er bygd heilt ut eller om det vert gjort i etappar.
Kommunen må avklara sambruk og samlokalisering av funksjonar med Vestland fylkeskommune i samband med bygging av ny VGS. Utviklinga av området vil skje over lang tid. For å sikre at området er attraktivt i heile utbyggingsperioden, må kommunen vurdera korleis området kan verte nytta i ein mellombels periode.
Etablering av nytt Sotrasamband og endringar i arealbruk vil gi eit anna trafikkmønster og nye gang- og sykkelvegar i regionsenteret enn det vi har i dag. Korleis får vi alt det nye som kjem med Sotrasambandet til å henga godt saman med resten av sentrum? Korleis skal framtidas køyremønster sjå ut, og korleis legg vi til rette for samanhengande tilbod til mjuke trafikantar i framtidas vegsystem?
Kommunen har behov for meir kunnskap for å kunna ta gode avgjersler og prioritera satsingar og tiltak som bidreg til velfungerande trafikkløysingar på Straume. Konsulent er i gang med trafikkanalysar, som skal vera eit kunnskapsgrunnlag for å definera eit framtidig gatehierarki, der ulike gater vert prioritert for ulike trafikantar og brukarar. Trafikkanalysen vil også tilrå koplingar og snarvegar for mjuke trafikantar på Straume. Dette arbeidet skal vera ferdig innan oktober 2024. Kommunen vil då ta stilling til framtidig køyremønster og korleis tilrettelegging for mjuke trafikantar skal løysast i eit framtidig vegsystem.
Øygarden kommune har behov for meir kunnskap om parkeringsløysingar som bidreg til redusera spreidd parkering og overflateparkering, for å dermed kunne gje plass til menneske, gatelivet og naturen. Vegsystemet etter etablering av nytt Sotrasamband endrar trafikkmønsteret på Straume, og kommunen må få ei betre oversikt og forståing av korleis parkering må handterast og kva for parkeringssystem det er behov for, i samband med det nye mobilitetsnettet.
Straume manglar ein tydeleg parkeringspolitikk og det er behov for ein parkeringsstrategi. Dei fleste p- plassane i sentrum er eigd av private aktørar, som gir lite handlingsrom for kommunal styring. Store delar av parkeringsplassane er gratis, men med ei tidsavgrensing i sentrumsareala. Mykje parkering og uoversiktlege areal skapar eit kaotisk trafikkmønster og potensielt trafikkfarlege situasjonar. Vi har behov for råd om kva parkeringssituasjon som vil gjera Straume til eit attraktivt senter, både å bu i og besøka.
Arbeidet med å utarbeida ein parkeringsstrategi er delt inn i to fasar. Første fase består av kartlegging og analyser for å vurdera kva moglegheiter ein har for parkering på Straume, saman med utvikling og konsekvensvurdering av ulike konsept og scenario for parkeringsstrategi på Straume. Kommunen har knytt til seg konsulentar som arbeidar med den første fasen, som skal vera ferdig innan september 2024. I fase 2 vil resultata frå fase 1 verte omsett til konkrete strategiar.
Planprogrammet skal definera viktige naturområde, samanhengande blå og grøne strukturar og behov for parker, uterom og aktivitetsarenaer i sentrum. Ein del av dette arbeidet vil handla om å finna gode klimatilpassingar og løysingar for naturbaserte overvassløysingar, finna ut korleis vi best kan bygga med landskapet og arbeida med målsettingar om arealbruk som arealnøytralitet i utviklinga (arealrekneskap). Programmet vil også måtta ta stilling til offentleg eigarskap av grøne areal og offentlege uterom i sentrum. Her må også kvalitet måtta vurderast opp i mot investeringskostnadar og driftskostnadar av ferdige anlegg. Arbeidet er i tidleg fase.
Barnetråkk er eit digitalt medverknadsverktøy der barn og unge kan spela inn i kart korleis dei brukar og opplever nærmiljøet sitt, trafikktryggleik, skulevegen eller vegen til fritidsaktivitetar. Metoden gir barn og unge moglegheita til å delta i og reelt påverka samfunnsutviklinga og staden dei bur på.
Til no har fleire barnehagar i kommunen og 5. og 8. trinn på nesten alle skulane gjennomført barnetråkk.
Kunnskapen vi får inn frå registreringane til barna vil vera nyttig informasjon for arbeidet med arealdelen til kommuneplanen, men også for andre pågåande planarbeid og strategidokument. Som til dømes barnehage- og skulebruksplanen, trafikksikringsplanen, ein eigedomsstrategi for kommunale bygg, strategisk planprogram for Straume og områdeplanen for Stovevatnet.
Sist endra 31.05.2024 12.32