Vigilo vert innført som Øygarden kommune sitt oppvekstadministrative system og mykje av det daglege administrative arbeidet for kommunale skular og barnehagar vil bli gjort i Vigilo. Besøk nettstaden til Vigilo for meir informasjon.

For dykk som foreldre vil den største merkbare endringa vera overgangen frå Transponder til Vigilo for kommunikasjon med kommunale skular og barnehagar.

Det er mykje nytt for alle som skal bruka systemet. Det kan medføra endringar i rutinar for barnehagar og skular, noko som kan påverka deg som forelder. Dersom det medfører utfordringar for deg, ber vi om at du held god dialog med skulen eller barnehagen slik at vi finn gode løysingar.

I systemet ligg personopplysningar og informasjon om alle barn og foreldra deira.
Personopplysningane vert henta frå Folkeregisteret og Kontakt- og reservasjonsregisteret, og foreldra må sørgja for at informasjonen er riktig.

Foreldreansvar skal meldast i Folkeregisteret

Kontaktinformasjon skal meldast i Kontakt- og reservasjonsregisteret

Det vert opna for pålogging på Vigilo sin app og Foreldreportalen ved nytt skule- og barnehageår.

Foreldreportalen er tilgjengeleg i alle nettlesarar. Du loggar deg på foreldreportalen via ID-porten.

På smarttelefon kan du lasta ned Vigilo sin app frå App Store eller Google Play. Etter installasjon vel du Logg inn → Øygarden kommune → ID-porten. Derfrå opprettar du ein PIN-kode, og du kan óg aktivera fingeravtrykk eller ansiktsgjenkjenning. Meir informasjon om Vigilo app her.

For meir informasjon app og foreldreportalen her. Ikkje alle funksjonar vil vera tilgjengelege ved oppstart.

Sjå her korleis du sender melding i appen.

Sjå her korleis du sender melding via Foreldreportalen i nettlesaren.

Du må vera merksam på kva type informasjon du sender via Vigilo, anten som del av ei melding eller som vedlegg. Sensitive personopplysningar skal aldri sendast via Vigilo:

• opplysningar om rasemessig eller etnisk opphav
• opplysningar om politisk oppfatning
• opplysningar om religion
• opplysningar om filosofisk overtyding
• opplysningar om fagforeiningsmedlemskap
• genetiske opplysningar
• biometriske opplysningar (når behandlingsformålet er eintydig å identifisere nokon)
• helseopplysningar
• opplysningar om seksuelle forhold
• opplysningar om seksuell legning

Foreldre med registrert foreldreansvar i Folkeregisteret har tilgang til informasjon og kommunikasjon om eigne barn. Søknader om justeringar kan berre gjerast av dei med registrert foreldreansvar, og kan gjerast her.

Hovudregelen er at dei med foreldreansvar har krav på same informasjon frå skular og barnehagar om barnet sitt:

Barnelova § 47. Rett til opplysningar om barnet
Foreldre som har foreldreansvar, har rett til opplysningar om barnet når dei bed om det. Har den eine av foreldra foreldreansvaret åleine, skal denne gje den andre opplysningar om barnet når det blir bede om det. Den andre har òg rett til å få opplysningar om barnet frå barnehage, skule, helse- og sosialvesen og politi, om ikkje teieplikta gjeld andsynes foreldra. Slike opplysningar kan nektast gjeve dersom det kan vere til skade for barnet.

Innføring er ei stor endring som involverer alle barnehagar, private og kommunale, i kommunen. Mykje vert ordna automatisk for deg, men i enkelte situasjonar må familien legga inn informasjon på nytt, sjølv om de har oppgitt den før. Eit døme på dette er venteliste for barnehageplass. Dersom du har søkt om ny barnehageplass, overføring til annan barnehage eller har søkt om å endra opphaldstype, men ikkje fått tilbod per 14.08.24, må ny søknad registrerast i Vigilo. Nytt system er tilgjengeleg frå 15.08.24.
 

• Utdanningsdirektoratet skildrar barn og unge sine personvernrettar.
• For innsyn i personopplysningane kan du sende inn søknadsskjema til kommunen.
• Her finn du generell informasjon om kommunen si handsaming av personopplysningar.