Frå venstre bak: Ulveset skule v/ Benedicte Algrøy, Stranda skule v/Elin Taule, Skogsvåg skule v/Rita-Elise Hagenes, Landro skule v/Tonje Elisabeth Tuv Wilhelmsen, Hjelteryggen skule v/Ane Dale Erikstad og Ingrid Hamre Frå venstre framme: Rong skule v/ Belinda Hellesund, skulebibliotekkoordinator Trine Torsvik, skulebibliotekkoordinator og Fjell ungdomsskule v/Toril Aune Børmo, Bjorøy skule v/Marte Brynsmo Bjella, Sund ungdomsskule v/ Janet Sangolt Kleppe og Brattholmen skule v/Kjersti Ness.

Konferansen er utvikla av UiA, Skolebibliotekforeningen, Norsk Bibliotekforening Skole og Foreningen! les. 

Målgruppa for konferansen er skulebibliotekarar, lærarar, skuleeigarar og andre som er interesserte i skulebiblioteket som pedagogisk arena. Skulebibliotekarane fekk fagleg påfyll og praktiske døme på korleis ein kan vidareutvikla skulebiblioteket som ein arena for lesing og utforsking. 

Fokus på lesing

Det var kunnskapsminister, Kari Nessa Nordtun, som opna konferansen, som blant anna fortalte om leselyststrategien som blir presentert på Litteraturfestivalen på Lillehammer no i slutten av mai. Konferansen hadde eit breitt spekter av tema, men fokuserte spesielt på lesing i møte med dei digitale utfordringane vi står ovanfor, og kva desse utfordringa gjer med både uthald og konsentrasjon. Det var presentert forsking som viser korleis digitale distraksjonar kan svekka evna til fordjuping, og det vart diskutert ulike metodar for å fremja lesekultur. Medan litteraturen i seg sjølv ikkje endrar seg, er omgjevnadene våre i stadig endring, og vi treng medvitne strategiar for å handtera dei digitale hjelpemidla som påverkar både lesing og konsentrasjon. 

Motvekt til den digitale verda

Oppsummert kan vi seia at skulebiblioteket kan vera ein viktig motvekt til den digitale verda. Det kan vera ein stad for å stressa ned, finna ro og oppdaga ny kunnskap, utover det å berre lesa for lesinga si eiga skuld. For å oppnå dette må vi satsa på skulebibliotekarane våre. Dei må få tid og ressursar til å vera til stades for elevane, og dei må ha eit godt utval av bøker i skulebiblioteket sitt, som fangar interessa til elevane.

Vi håpar skulebibliotekarane frå Øygarden kom tilbake med ny inspirasjon og nyttig kunnskap som dei kan vidareformidla til både leiing og kollegaer på skulane. Dette vil koma elevane til gode og bidra til å styrkja skulebiblioteket si rolle som ein sentral pedagogisk arena.

 

Tekst og bilete: Toril Aune Børmo (skulebibliotekkoordinator Øygarden kommune)