Ungdomsrådet 2024. Fremst til venstre står Konrad Ørn. Nestleiar Eivind Økland står til høgre.

Ungdomsrådet støtta i hovudsak innstillinga frå kommunedirektøren, men gjorde nokre få endringar.

Desse får støtte frå ungdomsrådet i 2024:

• ADHD Norge Øyane lokallag     20 000 
• Sotra Badmintonklubb             10 000 
• Fjell Kystlag                            17 000 
• Sund e-sport                           20 000 
• Øygarden idrettslag                 20 000 
• Way Forward                           20 000 
• Tjeldstø grendalag                   20 000 
  Sum                                     127 000

Ved prioritering av midlar frå ungdomsrådet vert følgjande vektlagt: 

• Aktivitetar som vert drivne av ungdom 
• Tiltak som rettar seg mot sårbare grupper og ungdom som ofte fell utanfor organiserte aktivitetar, til dømes opne møteplassar som famnar mange, eller type aktivitetar som er attraktive for grupper som ikkje deltek i annan organisert aktivitet.
   

Nye tiltak vert ofte prioritert over tiltak som har fått støtte tidlegare.

Styrkjer ungdomstiltak på Straume

Ungdomsrådet tilrår å bruka 750 tusen kroner av avsette midlar årleg i økonomiplanen til å styrkja Ope hus-tilbodet Basecamp for ungdom i alderen 13 til 20 år. Midlane skal i første omgang nyttast til å sikra at Ope hus kan driftast vidare innanfor dagens opningstider. Resterande midlar skal nyttast for å sikra utvida opningstider og nye lokale med plass til fleire ungdommar. I tilrådinga heiter det også at kommunestyret ber Basecamp orientera om status for midlane innan utgangen 2024.

Ungdomsrådet tilrår vidare at dei resterande avsette midlane på 250 tusen kroner vert brukt til å utvida opningstid på innbyggartorget og biblioteket slik at ungdom i større grad kan nytta seg av tilbodet.

I økonomiplanen er det sett av årleg eín million kroner til ekstratiltak for ungdom/frivillige organisasjonar. Kommunedirektøren har innstilt på å bruka heile beløpet på Basecamp. Ungdomsrådet følgjer altså innstillinga i hovudsak, men tilrår altså at ein del av beløpet (250 tusen kroner) vert avsett til innbyggartorget og biblioteket. Saka går til endeleg behandling i kommunestyret.

Vil delta i arbeidet lokalsenter- og bygdestrategiar

I samband med arbeidet arealdelen til kommuneplanen vert det i desse dagar gjennomført  innspelsmøte i dei sju lokalsentera i kommunen. Det er utarbeidd ei eiga sak som handlar om korleis dei tre råda (ungdomsrådet, råd for personar med funksjonsnedsetjing og eldrerådet) kan engasjera i arbeidet med lokalsenter- og bygdestrategiar.

Ungdomsrådet sluttar seg til innstillinga frå kommunedirektøren der det heiter at råda mobiliserer dei målgruppene dei representerer til å delta på innspelsmøta som blir arrangert i lokalsentra våren 2024. Råda inviterer og mobiliserer sine målgrupper til å gjennomføra gjestebod. Hausten 2024 presenterer administrasjonen funn frå medverknadsarbeidet i råda. Råda gjer uttale til kunnskaps-/drøftingsgrunnlaget før politisk handsaming og vedtak av prinsipp for arealbruken i lokalsentera. Frist for å senda innspel som gjeld lokalsentra er sett til 23. juni 2024.

Andre saker

• Ungdomsrådet tilrår at ny forskrift om politivedtekter vert sendt ut på høyring. Formannskapet gjer endeleg vedtak.
• Det vert også tilrådd å starta arbeidet med framtidig organisering av bustadsosial arbeid i Øygarden kommune slik det går fram av saka. Det er tilrådd å etablera eit bustadkontor som eit to-årig pilotprosjekt. Kommunestyret gjer endeleg vedtak.

Orientering og arbeidsverkstad

Ungdomsrådet fekk orientering om arbeidet med Framtidssamfunnet. I drøftinga responderte ungdomsrådet positivet på prosjektet og ønskjer å verta involvert i arbeidet.

Det var også arbeidsverkstad der ungdomsrådet vart utfordra til å laga plan/skisse for videoar med tema om promotering av arbeidet til ungdomsrådet og korleis ungdom kan redusera skjermtid (t.d. på sosiale medium).

Her kan du lesa innkalling med saksdokument.


Tekst og foto: Vigleik Brekke