Samuel Brahane er glad for at han får dela kunnskap om Eritrea.

På kulturdagen i regi av vaksenopplæringa var det fullt av liv. Etter to dagar med gruppearbeid kunne deltakarane nytta 12 klasserom til å presentera landet sitt. Alle deltakarane fekk høve til å gå rundt å å få kunnskap om dei andre landa og kulturane. Med dans, mat og prat var stemninga på topp frå start til mål.

Her vert det gjeve innføring i detaljar i thailansk dans.

Samuel Brahane kom frå Eritrea til Noreg for to år sidan. No tek han grunnskuleutdanning på vaksenopplæringa.

- Eg måtte forlata Eritrea av politiske grunnar, men eg er kjempestolt av landet mitt og folkegruppa vår. Vi har to store religiøse grupper i Eritrea, den muslimske og den kristne, men vi lever godt saman utan konflikt. Sjølv er eg kristen og er aktiv i ei ortodoks kyrkje i Bergen, seier Samuel som bur saman med kjærast og to barn sentralt i kommunen.

Samuel fortel at jordbruk er ei viktig næring i Eritrea. Mange dyrkar korntypen Taf (teffmjøl) som mellom anna vert brukt for å laga eit svært populært brød, Hmbasha, som gjerne vert brukt ved festlege høve.

- Her i Øygarden er eg glad for å få jobba som ringevikar på Fjell sjukeheim. Vi nyttar oss også av open barnehage (KFUK KFUM). Elles er eg med i mange aktivitetar i kommunen, seier Samuel Brahane. 

Mange frå Ukraina deltok på kulturdagen.

Kan verta ein tradisjon

Einingsleiar for vaksenopplæringa, Nina Håvik Pettersen, og avdelingsleiarane Ragnhild Hareide Breivik og Renate Landro Lie har vore sentrale i planlegginga og gjennomføringa av kulturdagen. 

Det er deltakarar i norskopplæringa og dei som har grunnskuleoppæring som har delteke med presentasjonar på mønstringsdagen.

- Det har vore eit stort engasjement. Det har vore eit godt samarbeid, og deltakarane har lært å plukka ut det som er viktig. Dette kan gjerne verta ein tradisjon, seier Ragnhild Hareide Breivik og Renate Landro Lie.

Kommunalsjef for Oppvekst, Marius Sylta, besøkte kulturdagen. Han er imponert over kreativiteten som deltakarane viste.

- Dette er viktig for integreringa og eit fint avbrekk i skulekvardagen.  Det var flott å oppleva eit stort engasjement og få innblikk i det kulturelle mangfaldet i kommunen. Dette må gjerne verta ein tradisjon, seier Sylta. 

Kulturdagen vart avslutta med fellessamling med kultur- og musikkinnslag.

Her er fleire bilete:

Tekst: Vigleik Brekke
Foto: Nina Håvik Pettersen og Vigleik Brekke