Eldrerådet. Arkivfoto

I uttalen viser eldrerådet til at det er behov for 70 nye heildøgnsplassar om kommunen skal halda dekningsprosenten på 16 prosent. Eldrerådet er kjent med at det er på veg ein konsulentrapport som mellom anna handlar om omstilling.

- Eldrerådet meiner at det er heilt urealistisk å tru at omstillinga i eldreomsorga skal finansiera det vi treng av omsorgsplassar utover det som gjennomføringsplanen føreset, skriv eldrerådet i uttalen.

Det vert vidare vist til at målet er at eldre skal kunna bu i eigen heim så lenge det er forsvarleg. Kommunen skal gje den lovfesta helsehjelpa i heimen.

Eldrerådet minner også om at tilbodet om varm mat til heimebuande er viktig og at utviklinga av det prosjektet som alt er i gang, må evaluerast.

Eldrerådet minner igjen om tidlegare innspel om eldrekollektiv. Eldrerådet rår til at det i budsjettet for 2024 vert sett av midlar til å starte opp eit prosjekt som handlar om eldrekollektiv i grendene. Dette bør gå inn som ein del av arbeidet med etterbruk av tomme kommunale (og gjerne også private) bygg som ein finn rundt om i kommunen.

Eldrerådet skriv avslutningsvis at Øygarden kommune står framfor store utfordringar innan helse og omsorg. Det er no den sterke auken av eldre innbyggjarar tek til å slå ut for fullt.

- Eldrerådet håpar at kommunestyret no samlar seg om gode løysingar bygde på kunnskap og innsikt. Det er tid for handling, heiter det i uttalen til budsjettet.

Her kan du lesa heile uttalen. (PDF, 191 kB)