Marianne FurheimDen nye næringssjefen konkurrerte med mange sterke kandidatar. Det meldte seg 17 søkjarar til stillinga. Med brei arbeidserfaring innan bygg og anlegg, har Marianne Furheim engasjert seg i bransjen med verv i organisasjonar som Vest Næringsråd, Bergen Næringsråd og Byggmesterforbundet.
Marianne Furheim (46) ser fram til å jobba med, og for, eit variert og dyktig eksisterande næringsliv saman med alle dei gode kreftene i kommunen.
- Eg gler meg til å bli kjent med kommunen som organisasjon og arbeidsplass. Der vil eg møta mange nye kollegaer. Eg veit at det er mange dyktige tilsette i Øygarden kommune, seier ho.
Ho seier at det vert spennande og viktig å marknadsføra kommunen mot potensielle nye næringsaktørar og visa alt ein får til og om moglegheitene som ligg her.
- Og ikkje minst ser eg fram til å jobba med Framtidssamfunnet for å løysa morgondagens utfordringar. Det er eit spennande prosjekt som vil setja kommunen og involverte krefter på kartet, seier Marianne Furheim som tek til i stillinga 1. oktober.
Kommunedirektør Johnny Breivik seier at den nytilsette næringssjefen har god kunnskap og forståing for det viktige skjeringspunktet mellom næring og tenestene i kommunen innan areal, plan og byggesaker.
- Vi er stolte av at Marianne ønskjer å bidra i utviklinga av både kommuneverksemda og øygardssamfunnet og ser fram til å få henne på laget, seier kommunedirektøren.
Tekst: Vigleik Brekke
Foto: Privat