- Vi er avhengige av ein god kombinasjon av rutine og ungt pågangsmot. Å markera trufaste og lojale tilsette er noko av det kjekkaste eg gjer. Det sa kommunedirektør Johnny Breivik då han ønskte 140 jubilantar velkomen til fest sist veke.
Det var 40-årsjubilantar og 25-årsjubilantar som var samla til fest i kultursalen i Øygarden rådhus. Ettersom det ikkje hadde vore tilsvarande arrangement dei første åra i den nye kommunen, var det fleire årskull med jubilantar denne gongen.
I talen til jubilantane sa Breivik at verdsetting av trufaste og uthaldande tilsette er viktigare enn nokon gong.
- Markeringa i dag er ikkje eit pliktløp, men ei heilhjarta verdsetting av den verdien kvar enkelt av dykk betyr for oss. Jo, vi treng både friske pust, fornying og fersk kompetanse, Men dette er ikkje nok for å halda hjula i gang, sa direktøren.
Også ordførar Tom Georg Indrevik talte til jubilantane.
- Det er utruleg mange og dedikerte medarbeidarar i Øygarden kommune. Mange av dei sit her i dag. Eg vil nytta høvet til å takka for den omstillinga de har vore med på. Vi treng dykkar erfaring når vi no står framfor nye omstillingar, sa ordføraren.
Totalt var vel 200 jubilantar inviterte til festen.
Foto: Farshid Amini og Monica Hovland
Fotogalleri
Publisert 15.12.2023 12.59