Frå venstre; Kristin H. Geiring (rådgjevar Norsk kulturskuleråd Vestland), Malene Utskot (Kvam ungdomsråd), Mathilde Nonås (Vestland ungdomsutval og Bjørnafjorden ungdomsutval), Bjørn Andersen (rektor Øygarden kulturskule), Ernst M Einarsen (leiar levekårsutvalet Øygarden kommune), Kjartan Fjordheim (inspektør Øygarden kulturskule) og Sølvi Olrich Sørebø (seniorrådgjevar KS Vestland).

Blant foredragshaldarane var Barne- og familieminister Kjersti Toppe, professor Ola Honningdal Grytten, i tillegg til representantar frå Norsk kulturskuleråd, KS og kommunane (KS: fellesorganisasjon for kommunane).

Det var eit stort fokus på korleis ein tenkte seg framtidas kulturskule, og korleis han vil kunna vera eit viktig reiskap i arbeidet med å leggja til rette for tilbod som famnar om heile livsløpet. 

Ein av dei få politikarane som deltok på konferansen, var leiar for levekårsutvalet i Øygarden, Ernst M Einarsen. Han seier at det var særleg interessant å høyra om Bergen kommune sitt prosjekt «Kulturkarusellen» som er eit samarbeid mellom kulturskulen, SFO og grunnskule for å introdusera barna for dei mange ulike tilboda som ein kan søkja seg til. 

- Med bakgrunn i at vi har eit lågt tal på barn som nyttar seg av slike tilbod i vår kommune når vi samanliknar oss med andre, så er dette opplegget noko vi absolutt bør sjekka ut. Det kan absolutt vera ein veg å gå for oss også for å gjera fleire merksame på det gode tilbodet vi har i kommunen vår, seier Ernst M Einarsen.  Han representerte Øygarden saman med kulturskulerektor Bjørn Andersen og inspektør Kjartan Fjordheim.
 

Foto: Norsk kulturskuleråd