Mangeårig KrF-politikar og tidlegare statsråd Lars Gunnar Lie er død, 86 år gamal. Han vaks opp i gamle Fjell og busette seg i Øygarden etter 16 år på Stortinget.
- Som styreleiar i selskapet Sambandet Sotra/Øygarden-Bergen AS hadde han ei viktig rolle i arbeidet med å få planlagt nytt sotrasamband, seier ordførar Tom Georg Indrevik.
Lars Gunnar Lie (1938-2025)Det var Vårt Land som først melde om Lars Gunnar Lie sin bortgang.
Etter at Lars Gunnar Lie flytta frå Fjell, engasjerte han seg etter kvart i lokalpolitikken og sat i kommunestyret i Førde i åtte år, to år som ordførar.
Han var stortingsrepresentant frå Sogn og Fjordane frå 1985 til 2001 og var samferdsleminister i Syse-regjeringa 1989-1990. Lie var også engasjert i misjon og var i ein periode styreleiar i Det Norske Misjonsselskap.
Ordførar Tom Georg Indrevik vil gjerne takka Lie for hans store innsats som folkevald.
- Og som styreleiar i Sotrasambandet frå tidleg på 2000-talet var Lars Gunnar Lie ein viktig bidragsytar for å synleggjera behovet for og leggja grunnen for viktige avgjerder i arbeidet med å få realisert sambandet. Erfaringa hans som både stortingsrepresentant og samferdsleminister kom godt med i dette arbeidet, seier ordføraren.
Tekst: Vigleik Brekke
Foto: Stortinget
Publisert 20.04.2025 18.46