- Miljøsertifisering er viktig
Torsdag denne veka overrekte ordførar Tom Georg Indrevik miljøfyrtårnsertifikat til Lønningen & Nilsen AS i Tellnes Næringspark.
- Det er eit konkurransefortrinn å kunna føra opp at vi er miljøfyrtårnsertifisert, seier dagleg leiar og eigar Inge Fjæreide.
Ordførar Tom Georg Indrevik (til venstre) overrekte miljøfyrtårnsertifikatet til dagleg leiar Inge Fjæreide.Miljøfyrtårn er eit verktøy for sertifisering og miljøleiing som skal hjelpa bedrifter til å lukkast med den grøne omstillinga. Etter at bedriftene har dokumentert at dei kan få status som Miljøfyrtårn, er det klart for utdeling.
Inge Fjæreide starta som malar i Sotra Maling og Gulv i 1979. Seinare vart namnet endra til Lønningen & Nilsen AS. Fjæreide kjøpte seg opp i selskapet og vart eineeigar frå 2009. Selskapet har 22 tilsette og har ein årleg omsetnad på mellom 25 og 28 millionar kroner.
- Selskapet har gått på plussida og har pr. i dag ein solid ordrereserve. Vi har samarbeid med store entreprenørar i området og leverer mest til industri og større utbyggingsprosjekt, seier Fjæreide.
For å verta miljøfyrtårnsertifisert må det gjennomførast ei rekkje tiltak.
- Pr. dato er 66 prosent av bilparken elektrifisert. Vi praktiserer kjeldesortering og har avtale med Norsk Gjenvinning om å levera inn maling som ikkje vert nytta. Også malingsspanna vert levert inn etter at dei er tørka, seier Inge Fjæreide.
Tekst og foto: Vigleik Brekke
Publisert 13.06.2024 14.21