Linda Færestrand (til venstre) og Lena Fjeldstad vert pensjonistar etter mange års teneste i skulen her vest. Jon Erik Egeland takkar av som skulesjef.

Innan kommunalsjefområdet Oppvekst er det tilsett barne- og familiesjef. Her kan du lesa om Monica Johannessen Mørk som nyleg er tilsett i stillinga. Ho er på plass i den nyoppretta stillinga innan 1. oktober.

Rektor på Tranevågen ungdomsskule, Rune Golf, er tilsett som skulesjef og tek over stillinga i august etter Jon Erik Egeland. Les meir her.  Avdelingsleiar på Tranevågen, Martha Helen Listou, er tilsett som rektor etter Rune Golf. Listou er no konstituert rektor på ungdomsskulen.

Veteran takkar for seg

Jon Erik Egeland har 43 år bak seg som tilsett i kommunane Sund og Øygarden. Han starta som lærar på Pollen skule i 1981. Seinare underviste han på Sund skule i perioden 1988 – 1990. Han var rektor på same skule frå 1990 til 2000. I gamle Sund kommune var han leiar i utviklingsavdelinga frå 2000 til 2001 og kommunalsjef i om lag 20 år fram til 2020. I den nye kommunen frå 2020 har han vore assisterande kommunalsjef og skulesjef fram til 2024.

- Dette har vore 43 gode år. Eg har hatt varierte arbeidsoppgåver og vore leiar i 30 år. Det har skjedd store endringar i den tida eg har vore tilsett, og er har fått tatt del i endringsarbeidet på oppvekstområdet, seier han.

Han fortel at i Sund vart det gjort eit stort arbeid på  barnehage- og skuleområdet. I løpet av få år vart det bygd nye skular og barnehagar. Ved etableringa av den nye storkommune var ein godt rusta sør i kommunen.

- Det er eg stolt over at vi fekk gjennomført. I den nye kommunen har vi brukt mykje tid på å laga ein organisasjon i Oppvekst som legg til rette for godt samarbeid mellom tenestene. Det skjer mykje positivt i kommunen for tida, og eg er glad for å kunna bidra litt etter at eg har gått av som skulesjef i ei mindre stilling som rådgjevar, seier Jon Erik Egeland.

Rektorskifte på Skogsvåg og Tjeldstø skular

Lena Fjeldstad starta som lærar på gamle Fjell skule i 1987. Deretter underviste ho på Knarrevik skule før ho to steget over i fagforeiningsarbeid for Norsk Lærarlag og seinare Utdanningsforbundet. Vidare har Lena Fjeldstad jobba på skulekontoret i gamle Fjell kommune og som rektor på Pollen skule fram til den skulen vart lagt ned i 2015 og ho vart rektor på Skogsvåg skule.

Linda Færestrand rundar av som rektor på Tjeldstø skule der ho har vore sidan 2018. Ho starta lærarkarrieren på ein spesialskule for døve multifunksjonshemma barn på Andebu. Deretter tok ho vegen vestover til lærargjerning på Telavåg skule, Tellnes skule og Alvøen før ho vart rektor på Telavåg skule i gamle Sund kommune i sidan 2009.

- Akkurat det året (2009) var det var det tre nye rektorar som skulle tilsetjast, mellom anna Lena Fjeldstad og eg. No sluttar både Lena og eg, og tre nye rektorarar skal tilsetjast! seier Linda.

Linda Færestrand

Lena og Linda har opplevd at tida som rektor har både vore spennande, utruleg gjevande, utviklande og krevjande. 

- Å vera rektor i ein liten og i ein stor kommune er likt, men samstundes ganske ulikt. Det like er elevar, foreldre og tilsette. Det ulike er system, forventingar og tempo.  

Men dei to er ikkje i tvil.

- Skulle vi valt på nytt hadde vi blitt rektorar igjen!  Skulle vi ønska noko, så må det vera å kunna ha fokus på det pedagogiske utviklingsarbeidet meir enn administrasjon, seier Lena Fjeldstad og Linda Færestrand. 

Kommunalsjef Marius Sylta seier at dei erfarne pedagogane som no rundar av ei lang yrkeskarriere, har gjort ein viktig og stor jobb for Øygarden og dei tidlegare kommunane. 

- Dei har vore flinke til å ta omstillingar. Dette har dei takla på ein strålande måte. Eg unner dei verkeleg rolegare dagar. Eg er også sikker på at dei nye lærarkreftene vi no har fått på plass, vil bidra til å vidareutvikla oppvekstfeltet, seier kommunalsjefen. 

Lena Fjeldstad

Ny rektor på Skogsvåg skule frå august vert Ingrid Hestad. Ho kjem frå stilling på Loddefjord skole. På Tjeldstø skule tek Christine Taule over som rektor i august. Ho er no rektor på Davanger skole på Askøy.

Vi kjem tilbake til eigen artikkel om nytt innan barnehage.


Red.: Vigleik Brekke
Foto: Skogsvåg skule og Vigleik Brekke