Frå den offisielle opninga tysdag kveld. Frå venstre; ordførar Tom Georg Indrevik, dagleg leiar i OTD Odd Eide Knudsen, og varaordførar Anita Garlid Johannessen.

Den offisielle opninga var på eit hotell i Bergen sentrum. Men det er i Øygarden det skjer, anten det er snakk om OTD eller realiseringa av det grøne skiftet. Dagleg leiar, eller på fint Co-Owner OTD AS, Odd Eide Knudsen, er optimistisk med tanke på kor mange som vil finna vegen til Sotra Arena og dei andre tilgjengelege hallane på Søre Straume onsdag og torsdag.

- Eg reknar med at mellom sju og ti tusen vil vera innom dørene desse to dagane. Operatørane og innkjøparane ser behovet for å koma tettare på leverandørindustrien. Øygarden representerer eitt av dei største subsea-miljøa i verda, seier Knudsen.

Ordførar Tom Georg Indrevik

Ordførar Tom Georg Indrevik viste mellom anna til dei store aktørane Equinor, Shell og Total som står bak realiseringa av Northern Lights i Øygarden med mottaksanlegg på Ljøsøyna og lagring av CO2 2600 meter under havbotnen vest i havet.

- Desse  selskapa er nøkkelen til å skapa grøne arbeidsplassar i framtida. Merk dykk også at selskapet CIP planlegg eit storstilt hydrogenfabrikk i Øygarden, minna han om. 

Verdas første hydrogenproduksjonsanlegg med integrert CO2-lagring vart opna i Energiparken i Øygarden i oktober 2023.

- Eg er utruleg stolt av å vera ordførar med tanke på alt det som vert skapt i kommunen. Vi må bruka all tilgjengeleg teknologi for å skapa arbeidsplassar. Eg håpar de brukar desse dagane til å vedlikehalda nettverk og skapa nye nettverk, sa ordføraren.


Tekst og foto: Vigleik Brekke