Det strategiske partnarskapet mellom kommunen og NAV skal bidra til å sikra høg sysselsetjing og høg yrkesdeltaking. Det skal bidra til at utsette grupper får og sikrar varig tilknyting til arbeidslivet.

Inkluderingskontakt i NAV region vest, Ketil Skare, seier at NAV har ulike verkemiddel for å nå måla i samarbeidsavtalen.

-Dette er ein overordna strategisk samarbeidsavtale som er forpliktande for NAV. Dette samarbeidet skal bidra til redusert arbeidsfråfall og redusert sjukefråvær, seier Skare. Også rådgjevar Bente Sandaunet representerte NAV region vest.

Einingsleiar i NAV Øygarden, Nina Andersen, seier at det neste trinnet er å fylla rammeavtalen med innhald.

- Det er behovet til Øygarden kommune som er styrande for innhaldet i planen. Dermed kan NAV på ein effektiv måte dekka det kommunen har behov for, seier Andersen.

Formålet med samarbeidsavtalen er å formalisera og strukturera samarbeidet mellom kommunen og NAV. Samarbeidet omfattar tenestene frå NAV og kan omfatta rekruttering, inkludering og kvalifisering av arbeidssøkjarar til jobbar i kommunen. Avtalen regulerer elles rollene til kontaktpersonen i NAV og kontaktpersonen i kommunen.

Dei tillitsvalde og vernetenesta er involvert i det strategiske partnarskapet og underteiknar avtalen i tillegg til representantar frå kommunen og NAV.

Ketil Skare vert kontaktperson i NAV, medan einingsleiar HR og kompetanse, Kaja Pedersen, vert kontaktperson i kommunen.


Tekst og foto: Vigleik Brekke