Kommunedirektør Johnny Breivk

Årsaka til inntektsauken skuldast mellom anna nytt inntektssystem som inneber at inntektene første året vil vera om lag 12 millionar kroner høgare enn dei siste åra.

- Vi gler oss over auka inntekter, men med tanke på alle utfordringane for Øygarden kommune i tida som kjem, må omstillingsarbeidet vidareførast med full styrke, seier kommunedirektør Johnny Breivik.

I framlegget til statsbudsjett legg regjeringa til grunn ein vekst frå 2024 til 2025 i frie inntekter for kommunane og fylkeskommunane samla i landet på om lag 6,8 milliardar kroner. Dette utgjer ein auke på 5,8 prosent for landet og 6,1 prosent for Øygarden.

Veksten i frie inntekter skal mellom anna dekkja kostnader som følgje av
befolkningsutviklinga med fleire eldre innbyggjarar. Deflatoren (løns- og prisvekst) er i
framlegget til statsbudsjett 4,1 prosent. Denne er samansett av lønsvekst (4,5 prosent) og
prisvekst (3,5 prosent).

Sjølv om auken i frie inntekter vil vera kjærkomen, viser kommunedirektøren til mange utfordringar for Øygarden kommune. Kommunen har ein stor vekst i eldre i åra framover. Dette inneber at kapasiteten innan dette området må aukast. Det er eit stort og vedvarande vedlikehaldsetterslep knytt til kommunale bygg og infrastruktur.

- Stadig fleire har behov for sosialstønad og auken innan barnevern og spesialpedagogikk er krevjande å handtera. Det er difor framleis behov for omfattande omstilling i kommuneorganisasjonen for å sikra ei økonomisk berekraftig utvikling, seier kommunedirektøren.

Andre framlegg frå regjeringa:

• Meirverdiavgifta på vatn- og avlaupsgebyr vert redusert frå 25 prosent til 15 prosent frå 1. mai 2025.
• Regjeringa gjer framlegg om ei tilsegnsramme i 2025 for investeringstilskot for om lag 1 500 heildøgns omsorgsplassar.
• Tilskotsordninga for utstyr og læringsarenaer er vidareført og styrkt.
• Investeringsramma for rentekompensasjonsordninga vert auka, slik at kommunar og fylkeskommunar slepp å betala renter når det vert gjort store investeringar i læringsarenaer og utstyr som bidreg til meir praktisk og variert opplæring.
• Ny offentleg AFP vert innført frå 1. januar 2025. Regjeringa vil koma tilbake til verknader av og kompensasjon i revidert nasjonalbudsjett for 2025.