Skisse transformatorstasjon Skisse: Statnett

Utvalet var samla til møte på torsdag. I uttalen seier PMU at NVE må påleggja Statnett og BKK å arbeida heilskapleg med avbøtande tiltak som kan vera med å redusere negative konsekvensar for natur- og miljøinteresser og innbyggjarane våre. Dette inkluderer vurdering om omsøkt trasé frå kryss Dalsneset/Oksneset mot Kollsnes kan leggjast lenger mot sør parallelt med dagens trase.

Inklusive areal rundt tomta, beslaglegg Statnett om lag 120 dekar til transformatorstasjonen. Den samla kostnaden er mellom 2,2 til 2,7 milliardar kroner. Etter ferdigstilling kan kommunen få ein årleg eigedomsskatt på mellom 15 og 18 millionar kroner. Etter planen skal transformatorstasjonen vera klar til bruk innan utgangen av 2028.

Detaljreguleringsplan for ny fylkesveg 561 Kolltveit - Ågotnes 

Plan- og miljøutvalet slutta seg til framlegg til uttale frå kommunedirektøren om detaljreguleringsplan for ny fylkesveg 561 Kolltveit-Ågotnes.

Eit forslag frå Jonas Foldnes (SV) å fjerna ei setning i kap 2.2, 4. avsnitt, fekk ikkje fleirtal. Setninga han føreslo å fjerna var: Ein eventuell utviding av vegen i eksisterande trasé vil ikkje vere mogleg utan ekspropriasjon av ein rekke bustadhus.

Kommunestyret vedtok planen i desember 2019. Planen legg til rette for bygging av ny firefelts veg på strekninga. Statsforvaltaren har etter ein prosess kome til at ei mogleg løysing er at Statsforvaltaren opphevar planvedtaket delvis. Det er denne løysinga kommunen har gjeve uttale til. Her kan du lesa heile uttalen. (PDF, 6 MB)

Oppgradering av uteområda ved skulane

Etter forslag frå Anfinn Hammer på vegner av fleirtalspartia (Høgre, Frp, KrF, Sotralista -TVØ og Venstre) slutta eit samrøystes PMU seg til kommunaldirektøren si prioritering av avsette midlar til oppgradering av uteområda på skular og ber kommunedirektøren følgja vidare opp. Kategoriar av ABC-avvik må prioriterast, jamfør Helsevernetaten sine tilsyn. Vidare må det prioriterast tiltak på skular med låg standard på uteområdet.  

Arbeidet med å identifisera behova må utførast breitt og involvera alle skular med eit mål å gje gode kvalitative og universelle løysingar. Det skal i størst mogleg grad vera medverknad, dialog og samspel med skuleleiing, rektor, FAU og elevråd. Ei løypemelding med status og framdrift i saka vert lagt fram i PMU den 7. mars.

Kommunestyret avsette 10 millionar kroner i revidert budsjett (2023) til oppgradering av uteområda på skulane i kommunen.

Frå møtet i plan- og miljøutvalet 14. desember. Frå venstre; Arnfinn Hammer Feng (Frp), Silje Haukedal (kommunalsjef for Kultur og samfunn), Børge Haugetun (Sotralista - TVØ, utvalsleiar) og Michael Sangolt (H, nestleiar).

Nærmiljøtiltak på Misje, Ekerhovd og Pollen

Det har vore dialog mellom Øygarden kommune og Misje grendelag med sikte på å få etablert ein forsamlingsstad på den tidlegare skuletomta.

PMU slutta seg til tilrådinga og ber kommunedirektøren om å utforma ein leigeavtale med Misje grendelag som legg til rette for at bygda skal få etablera eit forsamlingshus på tomta. Forsamlingshuset må vera etablert innan tre år. Elles vert avtalen avslutta (terminert). Utvalet ber også kommunedirektøren om å koma tilbake med ei sak etter dialogmøte med grendelaga på Ekerhovd og Pollen.

Silje Ulveseth (Ap) føreslo eit alternativ til den siste setninga (pkt. 2) der det heiter at utval for plan og miljø ber kommunedirektøren koma tilbake med ei sak etter dialogmøte med grendelaga på Ekerhovd, Pollen og Blomvåg. Dette forslaget fekk to røyster (Ap og SV) og fall.

Tilrår å godkjenna planprogram for områderegulering for Energiparken Sør G

PMU tilrår at planprogram for områderegulering for Energiparken sør G vert vedteken. Ved endeleg vedtak vil planen overstyra seks andre detaljreguleringsplanar.

MDG føreslo endring i kap. 7.3, siste avsnitt der dei tre første setningane skulle endrast til: Planprogrammet skal følge Miljødirektoratet si "Håndbok om konsekvensutredning av klima og miljø, M-1941». Dette forslaget fekk fire røyster (Ap, INP (Industri- og næringspartiet), KrF og MDG) og fall.

Planområdet er på om lag 1 600 dekar, inklusive bufferområde. Energiparken i Øygarden er, og skal, utvikla seg vidare som eit senter for grøn industrietablering. Energiparken i Øygarden er lokalitet for dei næringane som skal være drivarar innan den grøne omstillinga i Noreg. Planarbeidet skal leggja til rette for storskala industrietablering i Energiparken sør.

Saka går til endeleg behandling i kommunestyret.

Skal vurdera moglege plasseringar og utforming av livsnøytralt seremonirom

Etter framlegg frå Michael Sangolt (H) vart det samrøystes vedteke å setja ned ei prosjektgruppe som skal kartleggja moglege plasseringar, krav til utforming og kostnader for ei etablering av eit livssynsnøytralt seremonirom i Øygarden kommune. Prosjektgruppa skal koma med framlegg til tilråding, inkludert kostnadsoverslag til budsjettprosessen for 2024. Bygg allereie i kommunalt eige skal nyttast med mindre særs gode grunnar tilseier noko anna.

Øygarden kommune manglar i dag eit fullverdig offentleg livssynsnøytralt seremonirom for innbyggjarane. 
Eit seremonirom kan romma ulike seremoniar som namnefest, dåp, konfirmasjon, vigsel/bryllaup, 
gravferd, gudstenester og offentlege minnemarkeringar.

Sluttbehandling av renovasjonsteknisk norm for Øygarden kommune  

PMU tilrår at kommunestyret vedtek Renovasjonsteknisk norm slik han ligg føre som vedlegg til saka.

Kommersiell utleige av fleirbrukshaller i Øygarden kommune (retur)
Plan og miljøutvalet ber kommunedirektøren arbeida vidare med scenario skissert i saka og kome tilbake med ei tilråding om modell for kommersiell utleige av fleirbrukshallar i kommunen.  

Høyringsuttale for namn på stoppestader i Øygarden kommune

Plan- og miljøutvalet gav tilslutnad til høyringsuttale slik det går fram under vurdering i saka og vedlagt liste over stoppestader i Øygarden med kommunen sine vurderingar.

Totalt 456 stoppestader er vurderte. Språkrådet føreslår endring av om lag 300 av desse. Namneutvalet støttar om lag 200 av endringsframlegga, medan ein i om lag 100 tilfelle har kome fram til anna tilråding enn det Språkrådet har gjort.

Utsette to saker

• Saka om forskrift om utleige av små elektriske køyretøy (elsparkesyklar) på offentleg grunn vart utsett.
   
• Også sak om etterbruk av Kolltveittunnelen vart utsett. Administrasjonen må leggja fram klarare alternativ med og utan bruk av Blomvåg skule. Eit eventuelt privat alternativ må leggast fram utan å knytast til sal av Blomvåg skule. Ved nybygg på Blomvåg skule-tomta bør plassering ta omsyn til samla framtidig bruk av tomta. Det vert peika på at investeringane i økonomiplanperioden kan bli utfordrande. I saka går det fram at tiltaket slår ut positivt gjennom redusert drift. Det er ønskeleg med ei klarare framstilling av dette i saka.    
  
  
  Tekst og foto: Vigleik Brekke