Frå møtet i levekårsutvalet den 13. desember.

I tilrådinga viser LKU til at kommunestyret vedtok i revidert budsjett for 2023 at det innan utgangen av året vert fremja ei sak med eit driftskonsept med formål om å etablera ein omsorgsinstitusjon innan barnevernet for å redusere kjøp av statlege institusjonsplassar. Det vert til revidert budsjett (2024) fremja sak om oppstart av omsorgsplassar for barnevernet i løpet av hausten 2024. Plassane skal delfinansierast ved innsparing ved kjøp av statlege institusjonsplassar. Det vert sett av fem millionar kroner i budsjettet for 2024 til formålet.

Det vert søkt om statleg medfinansiering for oppretting av ein kommunal omsorgsinstitusjon innan barnevernet.

I debatten sa utvalsleiar Ernst Einarsen at det har vore eit politisk ønske  at kommunen skal ta eit større ansvar for barn med samansette vanskar. Forslaget som vart samrøystes tilrådd, vart fremja av Høgre, Frp, KrF, Sotralista-TVØ og Venstre. Espen Cornell Jacobsen i Arbeidarpartiet sa at deira parti stilte seg bak forslaget. Han viste til at dette har ein jobba med i mange år.

Saka går til endeleg behandling i kommunestyret.  

Vil starta arbeidet med barnehage- og skulebruksplan

Etter framlegg frå Elna Nybakk på vegner av fleirtalspartia vart det samrøystes tilrådd at det vert sett ned eit tverrpolitisk utval med sju folkevalde og to frå organisasjonane som skal fremja ein barnehage- og skulebruksplan innan sommaren 2024. I forslaget heiter det vidare  at levekårsutvalet skal vera politisk styringsgruppe for prosessen. Leiar i det tverrpolitiske utvalet skal gje rapport om framdrift, status og behov for avklaringar i kvart møte i levekårsutvalet.

Det vart ikkje fremja forslag til kandidatar til utvalet. Det vert gjort når saka kjem til kommunestyret for endeleg vedtak. I drøftinga av saka gav fleire uttrykk for at dei i kommunestyret vil koma tilbake til kor mange medlemer som skal sitja i utvalet.

I saksutgreiinga går det fram at elevtalsprognosane for dei neste 10 åra viser ein forventa nedgang på om lag 300-500 elevar. Den noverande strukturen er ikkje i takt med utviklinga i barne- og elevtal, og det kan bli nødvendig å ta strukturelle grep for å sikra ei berekraftig og kvalitativt god barnehage- og skulestruktur for framtida. 

Espen Cornell Jacobsen (Ap) var mellom dei som støtta opp om forslaget om forprosjekt for oppretting av ein kommunal omsorgsinstitusjon innan barnevernet.

Vil løyva pengar til aksjonssenteret

Etter framlegg frå fleirtalspartia (Høgre, Frp, Sotralista-TVØ, KrF og Venstre) vart det tilrådd å løyva eín million kroner til døgndrift av aksjonssenteret på Øygarden lokalmedisinske senter på Straume. I tilrådinga vert det vist til at kommunestyret vedtok i 2021 ein opptrappingsplan for aksjonssenteret på Øygarden lokalmedisinske senter. Dette har ikkje blitt følgd opp, og det er heller ikkje sett av midlar i budsjett og økonomiplan 2024 – 2027 til vidare opptrapping av aksjonssenteret. 
- Det har vore ein klar intensjon at det skal vera døgndrift i 2024, heiter det i tilrådinga.

I dag er aksjonssenteret ope mellom klokka 08.00 og 15.00 på kvardagar. Frå juli 2023 har det vore to tilsette rådgjevarar som har teke hand om innbyggjarar som har teke kontakt. Det er venta at nærare 500 personar har teke og vil ta kontakt med aksjonssenteret i løpet av 2023. I framlegget til budsjett for 2024 har ikkje kommunedirektøren funne økonomisk handlingsrom for å følgja opp vedtaket i opptrappingsplanen frå 2021. 

Vil auka løyvinga til MOT

LKU tilrår å ta status 2023 og årsplan for 2024 for MOT til orientering. Etter framlegg frå Synne Nordøy i Høgre vart det tilrådd at tilskot i 2024 til «MOT-krydder» vert auka frå 30 tusen til 50 tusen kroner for kvar skule.  Dersom ein vel å bruke MOT som verktøy også for kommuneleiinga skal finansieringa av dette kome som tillegg til midlane som er retta mot MOT-ordninga for barn og unge.

Kommunedirektøren vert beden om å orientera LKU skriftleg om korleis arbeidet med MOT i skulane eventuelt har ført til redusert diskriminering, stigmatisering, mobbing, fiendtlege haldningar, og anna negativ åtferd ved dei ulike skulane våre.
I tilrådinga heiter det også at ein ber om at kommunedirektøren vurderer å knyta ansvaret og gjennomføringa av MOT-arbeidet mot kommunalsjefområde Oppvekst for å sikra ei best mogeleg samordning mot skulane og det spesifikke arbeidet mot mobbing i det felles mobbeprogrammet.

Saka går til endeleg behandling i kommunestyret.

Andre saker

• Orienteringssak om «Gjennomgang av BPA-ordninga i Øygarden kommune» vart teken til orientering, (BPA: Brukarstyrt personleg assistanse).
• Det vart tilrådd at ordninga med aktivitetskort og fritidskassa vert vidareført og vidareutvikla for å førebyggja utanforskap og fattigdom blant barn og unge.

Tekst og foto: Vigleik Brekke