Mange er involverte i arbeidet med "Næringsvennleg kommune". Frå venste; kommunedirektør Johnny Breivik, kommunalsjef for Kultur og samfunn Silje Haukedal, dagleg leiar i Øygarden næringsutvikling KF Hanne Misje Lokøy, einingsleiar for plan, geodata og oppmåling Hanna Gjesdal, byggesaksleiar Reidun Våge Danielsen og dagleg leiar i Vest Næringsråd, Kari-Anne Landro.

Undervegsrapporten ligg som referatsak til formannskapet den 19. desember. I rapporten går det fram at kommunen har eit godt styringsverktøy for næringsutvikling i samfunnsdelen til kommuneplanen, scenarieanalysar for næringsutvikling i Øygarden og planar for hub-etableringar. Kommunen har i tillegg eigarskap i fleire selskap som kan vera viktige partnarar for gjennomføring av tilrettelagde tiltak for næringsutvikling.

- Det finst ingen eksplisitt næringsstrategi, men samfunnsplanen og tilhøyrande kunnskapsgrunnlag dekkjer behovet. Dette stiller krav til tydeleg og regelmessig kommunikasjon om ambisjonar, strategiar, ressursbruk og ansvar/mandat mellom politikarane og administrasjonen, heiter det i rapporten.

I undersøkinga går det fram at fleire uttrykker seg kritisk til plan- og byggesak innanfor fleire felt:

• arealplanar må oppdaterast og ferdigstillast (uferdige planar er ein bremsekloss for utvikling)
• haldningar og signal frå administrativ leiing vert ikkje følgd godt nok opp på sektor-/tenestenivå
• for lang saksbehandlingstid
• uklar rettleiing frå saksbehandlarar
• behov for ein meir løysingsorientert kultur og betre kommunikasjon
• det er viktig å likebehandla store og små aktørar
• ønske om meir effektiv samhandling mellom kommune, fylkeskommune og statlege organ

Internt i kommunen er det eit uttalt ønske om å forbetra seg på byggesaksområdet. Dette arbeidet er ein i gang med. 

Undervegsrapporten viser elles at fleire erfarer at det er for høg detaljeringsgrad i areal- og reguleringsplanane og at det er «urimelege rekkjefølgjekrav som er vanskelege å gjennomføra i praksis. Det er også etterspurt landbruksfagleg kompetanse. Interkommunalt samarbeid på dette området er aktuelt. 

Neste steg i arbeidet med næringsvennleg kommune er ein intern arbeidsverkstad i januar. Seinare skal det gjennomførast ein arbeidsverkstad med kommune og næringsliv leia av PwC. Det skal utarbeidast tiltak knytt til satsingsområda som er omtalte i undervegsrapporten.

Les meir om undersøkinga her.  

Her kan du lesa undervegsrapporten. (PDF, 7 MB)

 

Tekst: Vigleik Brekke
Foto: Kjell Andersland