Trine Marlen Øren

Før ho kom til Øygarden som advokatfullmektig i 2016, arbeidde ho hjå Privatmegleren. I 2018 fekk ho advokatløyve, og sidan juli i år har ho vore konstituert som kommuneadvokat.

Einingsleiar i Tryggleik, June Johannessen, seier at Trine Marlen Øren med si erfaring har god innsikt i mange av dei juridiske problemstillingane som ein kommune til ei kvar tid står i. 

- Når det gjeld erfaringar frå rettslege prosessar har ho slutta å telja for lenge sidan, for det er blitt mange over dei sju åra ho har vore i kommunen. Dei som kjenner Trine, fortel om ein hyggeleg, fagleg og dyktig advokat. Ho vert opplevd som positiv og ein medarbeidar det er lett å samarbeida med, seier Johannessen.

Øren har altså vore konstituert i stillinga som kommuneadvokat sidan juli og har dermed godt kjennskap til kva denne stillinga inneber.

- Eg opplever å bli vist stor tillit ved å få denne jobben. No får eg eit endå sterkare eigarforhold til stillinga. Saman med advokatfullmektig Aleksander Risdal, som får advokatløyve i januar, er oppgåvene løyste på ein god måte. Eg ser fram til det vidare samarbeidet med han og dei andre tilsette i  kommunen. Hugs at som tilsett kan du ta direkte kontakt med oss, seier Trine Marlen Øren.


Tekst og foto: Vigleik Brekke